CONTOH PARAREM SEKAA GONG

MURDHA CITTA

Om Swastyastu

Om Awighnam Astu Nama Sidham

Malarapan antuk pasuwecan lan asung kerta waranugraha Ida Sang Hyang Widhi Wasa, Bhatara Bhatari sane malinga linggih ring Pura Kahyangan Desa Adat Cengkok, wastu prasida kasurat Pararem Sekaa Gong Dharma Kanti ring Desa Adat Cengkok.

Pararem Sekaa Gong Dhrama Kanti puniki maka sepat siku–siku pamatut sakaluwiring pamargin Sekaa Gong Dhrama Kanti Desa Adat Cengkok, ugi prasida kasungkemin prayojana sami, angidep muah amanggehaken kadi awig-awig utawi pararem indik Sekaa Gong Dharma Kanti Desa Adat Cengkok.

SARGAH I

ARAN LAN WAWIDANGAN

Pawos 1

1. Sekaa Gog sane kamanggehang puniki mawasta Sekaa Gong Dharma Kanti, Desa Adat Cengkok sane magenah ring wewidangan Desa Adat Cengkok.

2. Sekaa Gong Dharma Kanti puniki kadruwenang olih Desa Adat Cengkok, kamiletin olih krama Desa Adat Cengkok.

SARGAH II

PAMIKUKUH LAN TETUJON

Pawos 2

Sekaa Gong Dharma Kanti ngemanggehang pamikukuh minakadi:

1. Peraturan Daerah Propinsi Bali Nomor : 4 Tahun 2014 tentang Pelestarian Warisan Budaya Budaya Bali;

2. Awig-Awig Desa Adat Cengkok;

3. Pamutus Paruman Desa Adat Cengkok;

Pawos 3

Maka Tetujon Sekaa Gong Dharma Kanti:

1. Ngerajegang lan nincapang kasukertan Desa Adat Cengkok pamekas sekaa gong saha pawongannya sakala lan niskala;

2. Nincapang miwah nglimbakang seni budaya miwah tata sutreptin sekaa gong;

3. Ri sajeroning ngemargiang putusan ngelarang paras paros sarpanaya lan saluwung-luwung sebayantaka;

SARGAH III

UGER UGER MANGGALA SEKAA GONG

Manggala Sekaa Gong

Pawos 4

1. Manggala Sekaa Gong Dharma Kanti Desa Adat Cengkok inggih punika:

a. Bendesa utawi Kelian Desa Adat Cengkok;

b. Kelian Banjar Adat Cengkok;

Pawos 5

Sane dados kahadegang anggota utawi angga sekaa gong luwire:

a. Krama Desa Adat Cengkok sane munggah ring lekhitan banjar adat sajeroning Desa Adat Cengkok, turmaning jumenek magenah ring wawidangan Desa Desa Adat Cengkok;

b. Madue tanggung jawab pinaka swadarmaning dados sekaa gong;

Pawos 6

Swadarmaning Manggala Sekaa Gong luwire:

a. Bendesa Adat Cengkok pinaka Pembina miwah penasehat sajeroning sekaa gong saha ngicenin pamargi lan pawarah-warah ring prajuru;

b. Kelian Adat Banjar Cengkok pinaka Pembina miwah penasehat sajeroning sekaa gong saha ngicenin pawarah-warah ring prajuru;

Prajuru Miwah Angga Sekaa Gong

Pawos 7

1. Sekaa Gong Dharma Kanti kaenter antuk prajuru sane kasudi antuk Paruman Sekaa Gong, inggih punika:

a. Kelian (Ketua) adiri;

b. Pangliman (Wakil Ketua) adiri;

c. Patengen (Bendahara) kalih diri;

d. Panyarikan (Sekretaris) kalih diri;

e. Kasinoman (Juru arah) kalih diri;

2. Prajuru pinilihin sami madue swadarma majeng pamargi sekaa gong;

Pawos 8

Swadarmaning Prajuru Sekaa Gong luwire:

a. Ngarincikang program kerja selanturnyane ngalaksanyang sane sampun kapikukuhang olih paruman sekaa gong;

d. Nguningayang pamargin sekaa gong nyabran awarsa majeng ring angga sekaa gong makasami;

e. Ngamargiang pisadok utawi pihuning ngenenin indik kawentenan jinah utawi kas nyambran paruman sekaa gong;

f. Nyahcah sajeroning sekaa yening sampun ngalaksayang ayah-ayah utawi program sekaa gong;

Pawos 9

Sane dados kahadegang Prajuru luwire:

a. Angga Sekaa Gong Dharma Kanti sane munggah ring lekhitan panyerikan prujuru seka gong Dharma Kanti sajeroning Desa Adat Cengkok;

Pawos 10

Prajuru kagentosin utawi husan, malarapan antuk:

a. Seda utawi padem;

b. Mapinunas ngeraga sangkaning rahayu saha polih lugraha saking paruman sekaa gong;

c. Sungkan rahat tur suwe saha tan prasida ngmargiang swadarmaning prajuru;

d. Husan dados Sekaa Gong Dharma Kanti;

e. Sangkaning kahusanang antuk paruman Sekaa, mabukti iwang turmaning nenten nganutin uger–uger sekaa gong;

f. Sampun ngayah dados prajuru sekaa gong selami kalih warsa (2 tahun) ngawit saking kajudi dados prajuru ring paruman sekaa gong;

SARGAH IV

PAMIKOLIH SEKAA GONG

Pawos 11

1. Sekaa Gong Dharma Kanti wenang polih tuwas-tuwasan manut kawentenan kauangan Desa Adat Cengkok tur manut uger- uger sane kapastikayang sane kaunggahang ring paruman desa adat;

2. Sekaa Gong Dharma Kanti wenang nunas sekancan sane kabuatan ring program miwah pamargin sekaa gong majeng Desa Adat Cengkok;

3. Tetamburan sane sampun rusak utawi nenten prasida kaanggen, kahanan punika manados tanggung jawab Desa Adat Cengkok;

4. Sekaa Gong Dharma Kanti ri sajeroning ngamiletin ayah-ayahan nabuh ring Pura Kahyangan Tiga lan Prajapati Desa Adat Cengkok wenang mapikolih pisuguh samatra saking desa adat;

5. Sekaa Gong Dhama Kanti polih sesari ri tatkala ngayah matetamburan ring:

a. Pakubon Krama Desa Adat Cengkok miwah angga sekaa gong Rp. 300.000.,

b. Pakubon Krama Tamiu Desa ring Wewidangan Desa Cengkok Rp. 1.000.000,.

c. Pakubon Krama ring Dura Desa Cengkok Rp. 2.000.000.,

SARGAH V

SWADARMANIG LAN UGER-UGER PAMIDANDA

Pawos 12

Swadarmaning sekaa gong:

1. Sekaa gong patut tedun matetamburan (mapauruk lan ngayah) ri sajeroning sampun wenten pawarah-warah saha sampun masuara gendongan gong;

2. Sekaa gong patut mabusana adat nista utawi madia ri tatkala mapauruk miwah mabusana sane manut upacara ri tatkala ngayah ring pura yadin pakubon;

3. Sekaa gong wenang masadok sareng prajuru ri tatkala nenten sida ngamiletin matetamburan sangkaning wenten kapialangan;

Pamidanda sekaa gong:

1. Prajuru lan angga (anggota) sekaa gong sane malaksana tan patut utawi lempas ring uger-uger saha mawicara kaon lan byuta sane ngawinang sekaa gong duka patut keni pamidanda upakara guru piduka majeng ring Gong Desa Adat Cengkok;

2. Prajuru lan angga (anggota) sane nenten naenin nyarening ayahan utawi program sekaa gong selami ping pitu lan nenten wenten pasadok majeng prajuru, wenang kaunggahang ring paruman sekaa saha prajuru wenang nguningayang sareng manggala sekaa gong;

SARGAH VI

NGUWAH-NGUWUHIN PARAREM

Pawos 13

1. Nguwah-nguwuhin pararem puniki kelaksanayang antuk paruman sekaa gong manut tata cara sane patut, malarapan antuk sagilik seguluk.

2. Sakaluiring sane durung kabawos sajroning pararem puniki, patut kelaksanayang manut tata cara sane sampun mamargi, kadulurin antuk pararem lan sima utawi dresta sane ketah.

SARGAH VII

PAMUPUT

Pawos 14

1. Pararem puniki kawastanin Pararem Sekaa Gong Dhrama Kanti, indik Sekaa Gong Dharma Kanti.

2. Pararem Sekaa Gong Dhrama Kanti puniki kamargiang ngawit kararemin, Ahad Wage, tanggal 27 Januari 2019.

3. Pararem puniki kalingga tanganin olih Kelian Sekaa Gong miwah Penyarikan, kawikanin olih bendesa Adat Cengkok.

4. Luwir sang ngalingga tanganin:

Kelian Sekaa Gong Dharma Kanti

(Van Cahya)

Panyarikan,

()

Kawikanin: