MATERI CERPEN (SATUA CUTET)

 

CERPEN  (SATUA CUTET)

Teges Cerpén
Sakadi sampun kaunungin, kasusastraan Bali kabinayang dados susastra Bali purwa miwah
susastra Bali anyar. Kasusastraan Bali Purwa marupa karya-karya sastra sané sampun wénten
saking dumun minakadi gancaran, tembang, miwah sloka-sloka palawakya. Raris sajeroning Kasusastraan
Bali anyar wénten karya sastra marupa puisi miwah prosa. Puisi Bali anyar masaih
ring puisi basa Indonesia, kawacén nénten nganggén tembang sakadi ring puisi Bali Purwa sané
mawangun tembang. Puisi Bali anyar, akéh barisnyané nénten kaiket utawi bebas.
Wangun prosa Bali anyar pateh sakadi gancaran ring sastra Bali purwa. Prosa Bali anyar masaih
ring prosa Indonesia, sané marupa cerpén, novél, miwah drama tur sering kabaos cerita fiksi.
Dadosnyané cerpén Bali punika wantah sinalih tungil karya sastra Bali anyar mawangun prosa sané
ceritannyané cutet. Nyritayang kahuripan tokohnyané wantah akidik, nénten jangkep kadi ring
novel. Punika sané mawinan cerpén puniki sering kabaos satua bawak utawi cutet. Dadosnyane,
cerpén Bali punika wantah karya sastra Bali anyar mawangun gancaran sané ceritannyané bawak
utawi cutet.

Manut Sumarjo lan Saini sané pinaka cihnan cerpén inggih punika:
1. ceritannyané bawak utawi cutet,
2. masifat rekaan (fiction),
3. masifat naratif, miwah
4. madué kesan tunggal.

Unsur intrinsik cerpén inggih punika unsur sané wénten ring tengaing cerita. Unsur-unsur
intrinsik cerpén minakadi:
1. Téma ingih punika unteng bebaosan sané wénten ring cerita punika.
2. Sudut pandang inggih punika tata cara pengawi nyaritayang tokoh-tokohyané.
3. Latar(setting) inggih punika genah kelaksanayang cerita punika.
4. Amanat inggih punika pabesen sané pacang karauhang pengarang sajeroning ceritannyané
5. Alur (plot) inggih punika dudonan peristiwa utawi kejadian sané ngwangun cerita.

Alur cerpén kakepah dados tetiga inggih punika:
1. Alur maju inggih punika dudonan peristiwa sané urutannyané manut ring urutan dedauh
cerita sané mamargi.
2. Alur mundur inggih punika dudonan peristiwa sané urutannyané nénten manut ring urutan
dedauh cerita sané mamargi mabading.
3. Alur campuran inggih punika alur maju lan alur mundur sané madukan ring cerita punika.

Unsur Ekstrinsik Cerpén
Unsur ekstrinsik cerpén inggih punika unsur-unsur sané wénten ring sisin karya sastra
sakéwanten nénten langsung mempengaruhi wangun utawi sistem organism karya sastra punika.
Unsur ékstrinsik minakadi:
1. Nilai-nilai ring tengahing cerita (agama, budaya, politik, ekonomi)
2. Latar belakang kahuripan pengawi
3. Situasi sosial ritatkala cerita punika kakawin.

Conto Cerpen

BOOOMMMM

“Uli mara depak waton kanti jani suba makumpi tur boké mawarna dadua, tumbén
jani pekak ningeh, tur muktiang ada bom makeplug di gumi Baliné,” kéto Pekak Landung
makaengan ngajak truna-trunané sambil negak di batan jinengé. Pekak Landung biasa maortan-
ortan ditu sambilangé magambel rindik, masliahan suud magaé uli carik.
Pekak Landung kaloktah kaukina Pekak Véteran di banjarné, mapan mula ia pejuang
dugas jaman penjajah i pidan. Yadiastun suba mayusa ulung dasa tiban, Pekak Véteran enu
ceteng, enu nyidaang ka carik tur réncang majalan, sakéwala tusing bisa masandal, tusing bisa
manjus di WC, tusing bisa ngajeng capcay miwah sakancan dadaaran ané modéren.
Kaucap Pekak Véteran sawiréh semangat pejuangné tusing taén luntur. Yén ada anak
nyambatang “merdéka ngormat” nyingkir prajani Pekak Véteran nglejit bangun uli pasaréan,
tur malaib menékang lima ngormat padidi, ento awinan di banjarné liu anaké nyambatang
Pekak Véteran kadéwan-déwan dadi pejuang.
Ri sedek sakit ngebus dingin raganné, jag prajani ilang tur seger yan ningeh anak nyambatang
“merdéka”. Tan bina cara babotoh, yén tusing ada tajén, prajani ngaku sakit awak
sabuku-buku, batis lemet, tusing jaen madaar, sakéwala suba ningeh ada tajén jag prajani
ngléjat bangun tur seger tusing perlu maubad ka dokter.
Cucunné ané di pisaga madan Madé Lanus masih milu di jinengé ngorta tur matakon.
“Kak i pidan ngidang majalan neked ka margané, yén majalan apané ané kenyel?”..............Bersambung.....


Indayang cawis pitakén ring sor!
1. Napiké cerpén utawi satua bawak punika?
Cawisan:...............................................................................................
2. Cerpén ring sajeroning dagingnyané kapalih dados makudang unsur?
Cawisan:...............................................................................................
3. Téma inggih punika?
Cawisan:...............................................................................................
4. Sorohan alur kaepah dados makudang soroh?
Cawisan:...............................................................................................
5. Kewangun antuk napi kéwanten cerpén punika?
Cawisan:...............................................................................................

DAFTAR PUSTAKA:

-BUKU UDIANA SASTRA : DISDIKPORA PROVINSI BALI

Lokasi:

Berbagi :