Beranda / Aksara / Basa / Materi / Sastra

DRAMA CALONARANG

Posting Komentar


CALONARANG 
SEKA TERUNA DHARMA BAKTI
Om Swastyastu
Kaceritayang dumun kirang langkung abad ka-12 ring Panegara Daha, Kediri, Jawi. Madeg agung raja duk punika sane maparab Raja Airlangga. Desa Dirah sane rumasuk wewidangan Panegara Daha punika wenten nyeneng anak istri sane sampun katinggalin antuk somahnyane. Anak istri punika mawasta Walu Nateng Dirah (Balu pinih sakti ring Desa Dirah sane madue aji Dharma Wesi). Walu Nateng maderbe pianak istri adiri sane mawasta Ratna Manggali, anak istri sane ayu duk punika.
Sasampu munggah teruni, Ratna Manggali kantun ndewek nenten maderbe tetagon utawi anak lanang sane rumaket ring angennyane. Santukan Ratna sue nenten maderbe tetagon, ibunnyane murka ngantenang solah anak lanang ring desa punika sane takut saha nenten purun sareng Ratna samaliha akeh sane takut antuk kesaktian Walu Nateng Dirah.
Gelisang carita, Walu Nateng murka tur ngusak asik Desa Dirahe kantos ka jagat Daha keni baya. Tusta rena sane katiben ring panjake punika kapireng olih Raja Airlangga, raris ida nunas wantuan sareng Empu Baradah anggen nandingin utawi mangda digelis panjake sami rahayu. Empu Baradah sujatine nenten sumanggup nandingin kasaktian Walu Nateng, mawinan punika ida ngeka daya nikain sisyanyane sane mawasta Bahula apang sida marabian sareng pianak Walu Nateng.
Sasampune Bahula sareng Ratna kacunduk raris ipun sareng kalih makenalan, rasa seneng lan bagia nenten sida kasingidang saking manah Ratna Manggali santukan nembe kenal sareng anak lanang. Sangkaning matemu tresna pamuputne ipun sareng kalih marabian, rasa seneng taler krasain antuk Walu Nateng. Santukan tetujon marabian punika jagi ngambil buku mantra sakti duen Walu Nateng, mangkin Bahula nikain Ratna apang sida nyelang buku ibunnyane. Rasa tresna sane ageng kapining somahnyane, Ratna Manggali ngambil buku punika nangging nenten kauningin sareng ibunnyane.
Liang manah Bahula mawinan sampun sida ngambil buku mantra punika, manggda nenten kauningin antuk Walu Nateng, digelis mangkin Bahula matilar saking Dirah. Sampun tigang rahina Bahula nenten budal, manah Ratna takut santukan buku mantra punika dereng waliang saking somahnyane. Sinambi bengong irika wawu kegiat manah ipune, wawu uning Bahula sampun ngalinyokin padewekane. Digelis ipun nikain ibunnyane tur nunas iwang sampun ngambil buku mantra punika.
Wawu miragi pianaknyane mapajar sakadi punika, brangti manah Walu Nateng Dirah santukan buku mantranyane kapandung antuk jatma corah punika. Rasa brangti sane kaliwat mawinan Walu Nateng sareng sisiannyane sane mawasta “LENDA LENDI” ngrurug jagate saha mapralina para janane. Riantukan sampun makinkin pralaya jagate, medal mangkin Empu Baradah sane sampun uning daging buku mantra sakti punika. Kaceritayang Empu Baradah mayudan sareng Walu Nateng Dirah. Pamuputne kaon Walu Nateng ring payudan saha panjak ring Panegara Daha mawali trepti miwah rahayu.  
Puput kasurat duk  rahina soma wage sasih kasanga caka 1935, nglungsur sinampura yening wenten carita ring ajeng nenten manut ring sastra santukan sang sinurat kalintang tambet.        Om Santih, Santih, Santih, Om.   15.02.16
ipil-ipil saking makudang-kudang cakepan

Lokasi:

Posting Komentar untuk "DRAMA CALONARANG "