PARAREM LPD CENGKOK 2021

MURDHA CITTA

Om Swastiastu

Om Awighnam Astu Nama Siddham

Malarapan antuk pasuwecan lan asung kerta waranugraha Ida Sang Hyang Widhi Wasa, Bhatara Bhatari sane malinga linggih ring Kahyangan Desa Adat Cengkok, wastu prasida kasurat Pararem Desa Adat Cengkok Indik Lembaga Perkreditan Desa (LPD) Desa Adat Cengkok.

Pararem Desa Adat Cengkok puniki maka sepat siku–siku pamatut sakaluwiring pamargin Lembaga Perkreditan Desa ( LPD) Desa Adat Cengkok, ugi prasida kasungkemin prayojana sami, angidep muah amanggehaken kadi awig-awig utawi pararem indik Lembaga Perkreditan Desa (LPD) Desa Adat Cengkok.

Pararem LPD puniki patut katitenin miwah kaparipurnayang nyabran limang (5) warsa nganutin kahanan wibaga saha pakibeh jagat. Para Prajuru, bilih-bilih para manggala kaaptiang pisan mangda jangkep nyungkemin sadaging Pararem puniki mawastu prasida nyobyahang ring krama desa taler nunas pangestu miwah para manggala LPD prasida ngalaksanayang sakabuatipun.

Mogi Ida Sang Hyang Widhi Wasa kalih prabhawa Ida sane malinggih ring luhuring Pura Kahyangan Desa setata ledang asung kertha waranugraha mapaica pamargi sane becik ring krama Desa Adat Cengkok.

Om Santih, Santih, Santih Om

SARGAH I

ARAN LAN WAWIDANGAN

Pawos 1

1. Lembaga Perkreditan Desa sane kamanggehang puniki mawasta Lembaga Perkreditan Desa Adat Cengkok sane kasurat kalih kinucap LPD Adat Cengkok.

2. LPD Desa Adat Cengkok puniki kadruwenang olih Desa Adat Cengkok, kaempon olih krama Desa Adat Cengkok.

SARGAH II

PAMIKUKUH LAN TETUJON

Pawos 2

Lembaga Perkreditan Desa (LPD) ngemanggehang pamikukuh minakadi:

1. Peraturan Daerah Provinsi Bali Nomor 3 Tahun 2003 Tentang Perubahan Atas Peraturan Daerah Propinsi Bali Nomor 3 Tahun 2001 Tentang Desa Adat;

2. Peraturan Daerah Propinsi Bali Nomor : 8 Tahun 2002 tentang Lembaga Perkreditan Desa (Lembaran Pemerintah Daerah Provinsi Bali Tahun 2002 Nomor 20, Tambahan Lembaran Daerah Propinsi Bali Nomor 3) sebagaimana beberapa kali telah diubah, terakhir dengan Peraturan Daerah Propinsi Bali Nomor 4 Tahun 2012 tentang Perubahan Kedua Atas Peraturan Daerah Propinsi Bali Nomor 8 Tahun 2002 tentang Lembaga Perkreditan Desa (Lembaran Daerah Propinsi Bali Tahun 2012 Nomor 4 ).;

3. Peraturan Gubernur Bali Nomor : 11 Tahun 2013 tentang Pelaksanaan Peraturan Daerah Propinsi Bali Nomor 8 Tahun 2002 tentang Lembaga Perkreditan Desa, sebagaimana telah diubah beberapa kali terakhir dengan Peraturan Daerah Propinsi Bali Nomor 4 Tahun 2012 tentang Perubahan Kedua Atas Peraturan Daerah Propinsi Bali Nomor 8 Tahun 2002 Tentang Lembaga Perkreditan Desa (Berita Daerah Propinsi Bali Tahun 2013 Nomor 11);

4. Surat Keputusan Gubernur Bali Nomor 767/01-D/HK/2009 Tanggal 9 Juli 2010 Tentang LPD Desa Adat Cengkok;

5. Peraturan Daerah Provinsi Bali Nomor 04 Tahun 2019 tentang Desa Adat Bali;

6. Awig-Awig Desa Adat Cengkok;

7. Pamutus Paruman Desa Adat Cengkok;

Pawos 3

Maka Tetujon LPD Adat Cengkok:

1. Ngerajegang lan nincapang kasukertan Desa Adat Cengkok, saha pawongannya sakala lan niskala.

2. Nincapang tata sukerta lan pelaba Desa Adat.

3. Ring sajeroning ngemargiang putusan ngelarang paras paros sarpanaya lan saluwung-luwung sebayantaka.

SARGAH III

UTSAHA LAN MODAL

Pawos 4

Utsaha–utsaha LPD Adat Cengkok minakadi:

a. Nerima Simpenan saking krama Desa Adat Cengkok, marupa tabungan sukarela, tabungan berjangka, lan tabungan sane tiosan;

b. Nguwèhin jinah ring krama Desa Adat Cengkok sane mabuat nyelang jinah, manut kawigunan ipun;

c. Nerima jinah sangkanin nyelang ring lembaga kauwangan tiosan malarapan antuk pamutus Paruman Prajuru Desa Adat Cengkok;

d. Nyarengin utawi penyertaan modal ring utsaha sane tiosan druwen Desa Adat Cengkok malarapan antuk pamutus Paruman Prajuru Desa Adat Cengkok;

e. Utsaha – utsaha sane tiosan manut pamutus Paruman Prajuru Desa Adat Cengkok;

Pawos 5

1. Modal sane kaanggen ngerajegang utsaha LPD Adat Cengkok, luire:

a. Wantuan saking Pemerintah Provinsi Bali (Modal Awal) 20,000,000;

2. Modal selantur ipun saking sisa hasil utsaha sane kamolihang antuk LPD;

SARGAH IV

UGER UGER MANGGALA LPD

Palet 1

Manggala LPD

Pawos 6

1. Manggala LPD Desa Adat Cengkok inggih punika:

a. Panureksa sane kasinanggeh Pengawas Internal utawi Badan Pengawas;

b. Prajuru (Pangoreg) kasinanggeh Pengurus LPD;

c. LPD dados kawewehin antuk karyawan/pegawai pinaka narapraja manut kawigunan lan kawentenan kauwangan LPD;

2. Pengawas internal minakadi;

a. Ketua lan sanistanya kalih diri angga (anggota);

b. Sane kahadegang dados Ketua Pengawas Internal inggih punika Bandesa Adat Cengkok Anggota Pengawas internal kasudi antuk Paruman Prajuru Desa;

a. Ketua lan anggota pengawas internal tan kalugra ngerangkep dados Prajuru LPD;

Pawos 7

Sane dados kahadegang anggota Pengawas Internal LPD luwire:

a. Krama Desa sane munggah ring lekhitan banjar adat sajeroning Desa Adat Cengkok, turmaning jumenek magenah ring wawidangan Desa Desa Adat Cengkok;

b. Madruwe ijasah sanistanya puput masekolah ring SMA tur kapineh nyandang dados anggota pengawas internal;

c. Waras tur nenten sungkan-sungkanan;

d. Satya, teher tur madruwe rasa wirang ring LPD;

e. Uning ring pamargin tata kelola kauangan;

f. Nenten naenin keni tindakan pidana hukum lan narkoba;

Pawos 8

Swadarmaning Pengawas Internal luwire:

a. Mratyaksayang kawentenan lan pemargi utawi pengelolaan LPD;

b. Ngicenin pemargi lan piwarah ring Prajuru LPD sajeroning nincapang kawigunan kamolihan manut sekadi patitis lan mamikukuh LPD;

c. Niwakang tatimbang ring Prajuru LPD utawi pamutus babawos indik wyawahara ring LPD;

d. Nitenin lan nureksain pamargin utsaha lan kauwangan LPD;

e. Nyobyahang kawentenan lan pemargi utsaha LPD majeng ring krama desa;

f. Nguningayang indik panureksan (audit) LPD majeng ring paruman desa sanistananyane nyabran awarsa;

Pawos 9

Pengawas internal kagentosin utawi husan, malarapan antuk:

a. Seda;

b. Mapinunas ngeraga sangkaning rahayu saha polih lugraha saking prajuru desa;

c. Sungkan rahat tur suwe saha tan presida ngamargiang swadarmaning pengawas internal;

d. Tutug sengker pangadege;

e. Wusan dados Krama Desa Adat Cengkok;

f. Sangkaning kahusanang antuk paruman desa, mabukti iwang turmaning melaksana tan patut utawi lempas ring uger-uger LPD saha pasuwara Sang Angawa Rat;

g. Samput puput sengker seakehnyane 2 (kalih) periode dados Pengawas Internal;

Pawos 10

Pengawas Internal wenang polih tuwas-tuwasan nyabran panguntat sasih:

a. Ketua Pengawas polih 25% X Gaji Ketua LPD.

b. Anggota Pengawas polih 80% X Pamikolih Ketua Pengawas.

Palet 2

Prajuru lan Pengurus LPD

Pawos 11

1. LPD Desa Adat Cengkok kaenter antuk prajuru sane kasudi antuk Paruman Desa Adat, inggih punika:

a. Ketua;

b. Tata Usaha taler kabaos Sekretaris;

c. Juru Raksa taler kabaos Bendahara;

2. Prajuru pinilihin miwah kapastikayang malarapan paruman desa lan kakaryanang Surat Keputusan (SK) Badan Pengawas lan Surat Keputusan (SK) Pengurus LPD olih Manggala Desa Adat;

3. Napkala manut sakabuwatan ipun, Manggala Desa wenang nyudi prajuru LPD , tur salantur ipun katunasang tatimbang malarapan paruman desa adat;

4. Ketua LPD dados ngangkat Karyawan dipetprade kakirangan pegawai, patut masadok matatimbang ring prajuru desa taler polih pamutus Paruman Desa tur wenang Kakaryaning Surat Keputusan (SK) Karyawan antuk Ketua LPD;

Pawos 12

Ngadegang prajuru LPD majalaran antuk Paruman Desa Adat saha Surat Keputusan (SK) Bandesa Adat lan kahuningayang majeng ring Bupati lan Gubernur mawit saking Lembaga Pemberdayaan Lembaga Perkreditan Desa (LPLPD).

Pawos 13

Swadarmaning Prajuru LPD luwire:

a. Ngarincikang program kerja lan kauwangan LPD nyabran awarsa, anggen nincapang pamargin LPD;

b. Ngelaksanayang program kerja lan kauwangan LPD sane sampun kapikukuhang olih paruman desa mawit saking pengawas internal;

c. Ngarincikang pidabdab- pidabdab pamargin LPD mangda prasida manut ring pararem lan nginutin geguat Sang Angawa Rat;

d. Nguningayang pamargin LPD nyabran asasih majeng ring Bupati, Gubernur mawit saking Lembaga Pemberdayaan Lembaga Perkreditan Desa ( LPLPD);

e. Ngamargiang pisadok utawi pihuning sanunggil tigang (3) sasih ngenenin indik kawentenan lan pamargin utsaha LPD majeng ring Manggala Desa Adat Cengkok;

Pawos 14

1. Prajuru LPD wenang ngadegang lan nguwusan karyawan manut kabuwatan lan kawentenan.

2. Ngadegang karyawan LPD manut kadi kasurat kaping (1) majalaran antuk Surat Keputusan Ketua LPD.

3. Ngadegang lan nguwusan karyawan olih Prajuru LPD risampune kacumponin olih pengawas internal, prajuru desa saha pangestu saking paruman desa adat.

Pawos 15

Sane dados kahadegang Prajuru lan karyawan LPD luwire:

a. Krama Desa sane munggah ring lekhitan banjar adat sajeroning Desa Adat Cengkok, turmaning jumenek magenah ring wawidangan Desa Desa Adat Cengkok;

b. Madruwe ijasah sanistanya puput masekolah ring SMA tur kapineh nyandang dados Prajuru LPD;

c. Mayusa sanistanya palekutus (18) warsa utawi sampun marabiyan ;

d. Waras tur nenten sungkan – sungkanan;

e. Satya ,teher tur madruwe rasa wirang ring LPD;

f. Huning ring pamargin tata kelola kauwangan;

g. Nenten naeim keni pabuat pidana hukum lan narkoba;

Pawos 16

Prajuru lan Karyawan LPD kagentosin utawi husan, malarapan antuk :

a. Seda;

b. Mapinunas ngeraga sangkaning rahayu saha polih lugraha saking pengawas internal;

c. Sungkan rahat tur suwe saha tan prasida ngamargiang swadarmaning prajuru lan karyawan;

d. Wusan dados Krama Desa Adat Cengkok;

e. Sampun mayusa 50 warsa;

f. Sangkaning kahusanang antuk paruman desa, mabukti iwang turmaning nenten nganutin awig- awig, uger – uger LPD lan sahananing pituduh pengawas internal lan parajuru desa;

Pawos 17

1. Sengker pangadeg Prajuru LPD malarapan antuk evaluasi kinerja lan sertifikasi kompetensi;

2. Evaluasi kinerja manut kasurat kaping (1) kalaksanayang nyabran awarsa olih pengawas internal kasarengin antuk Lembaga Pemberdayaan Lembaga Perkreditan Desa ( LPLPD);

3. Malarapan antuk evaluasi kinerja, Prajuru, lan karyawan LPD sane molihang kinerja becik wenang kasudi malih dados prajuru lan karyawan;

4. Sengker lan masa bakti prajuru Lembaga Perkreditan Desa (LPD) inggih punika wantah limang (5) warsa lan dados kapilih malih utawi sampun puput sengker mayusa 50 warsa;

Pawos 18

Pamikolih Prajuru Lan Karyawan

1. Prajuru lan karyawan wenang polih tuwas-tuwasan manut kawentenan kauangan LPD tur manut uger- uger sane kapastikayang sane kaunggahang ring Rencana Kerja lan Rencana Anggaran Belanja ( RK-RAPB) LPD;

2. Phalapeksaning prajuru lan karyawan manut kasurat kaping ( 1 ) marupa laba/untung 25% saking pendapat bersih (nett profit) pikolih LPD nyabran panguntat sasih sane kakepah:

a. Gaji;

1. Ketua polih 27%

2. Sekretaris polih 22%

3. Bendahara polih 20%

4. Karyawan (I) polih 16%

5. Karyawan (II) polih 15%

c. Jasa Produksi nyabran panguntat warsa indik tuwas-tuwas nganutin ring ajeng (a);

d. Phalapeksaning tiosan sane patut (sah);

e. Libur/prai nganutin uger-uger sane mamargi ring guru wisesa (peraturan tenaga kerja);

3. Tuwas-tuwasan persentase ring ajeng nganutin: linggih (jabatan), suwen makarya (masa kerja), lan abot pakaryan (beban kerja).

4. Nguwah-nguwuhin tuwas-tuwasan phalapeksaning kabenjang pungkuran nganutin kahanan kauwangan, asset, lan aab LPD taler wenang kasobyahang ring krama desa adat maduluran pangricikan ring prajuru desa.

Pawos 19

Manggala LPD polih BPJS Kesehatan lan BP Jamsostek sane tatacara pamargin lan tetaurannyane (pembayaran) nganutin uger–uger utawi Undang-Undang Ketenaga Kerjaan.

SARGAH V

TABUNGAN, DEPOSITO, LAN KREDIT

Palet 1

Indik Tabungan Lan Deposito

Pawos 20

LPD Desa Adat Cengkok, nerima tabungan saking krama desa Adat luwire Tabungan Sukarela, Deposito lan simpenan tiosan sane manut antuk kawentenan maka dasar nincapang pikolih lan pamargin utsaha LPD.

Pawos 21

Bunga Tabungan setunggil sasih polih bunga manut kewentenan pasar lan kawentenan LPD selanturnyane kaputus antuk pararem utawi olih Prajuru LPD antuk ngamedalang Surat Keputusan (SK) indik Suku Bunga sane kacumponin olih Pengawas Internal.

Pawos 22

Bunga Deposito setunggil sasih polih bunga manut kewentenan pasar lan kawentenan LPD selanturnyane kaputus antuk pararem utawi olih Prajuru LPD antuk ngamedalang Surat Keputusan (SK) indik Suku Bunga sane kacumponin olih Pengawas Internal.

Pawos 23

Sane dados ngenahang jinah (simpenan) ring LPD Desa Adat Cengkok minakadi :

a. Krama Desa Adat Cengkok;

b. Krama Dura Desa sane nganutin daging uger–uger LPD Desa Adat Cengkok;

Palet 2

Indik Kredit

Pawos 24

LPD Desa Adat Cengkok, nguwehing jinah (kredit) ring krama Desa Adat Cengkok sane mabuat nyelang jinah utawi krama tiosan sane nyandang kapineh tur nganutin daging uger – uger LPD Desa Adat Cengkok, manut kawigunan ipun.

Pawos 25

Pidabdab tata cara nyelang jinah ring LPD Desa Adat Cengkok inggih punika kadi ring sor:

a. Sapa sira ugi pacang nyelang jinah, mangda madasar lekhite sane karauhang ring Prajuru LPD, madue wala/boreh (jaminan barang) nganutin SOP Kredit, saha mangda sapihuning Bandesa Adat;

b. Ri sampune kapastika olih Prajuru LPD sang nyelang jinah mangda ngalingga tanganin lekhite pasobhaya sang nyelang sareng Prajuru LPD sane kaupasaksi olih Bandesa Adat;

c. Sang nyelang jinah mangda ngalingga tanganin lekhite pasobhaya, nyihnayang raga pacang nginutin sahananing pasobhaya sane sampun kasungkemin. Lekhite inucap taler mangda kalingga tanganin olih sinalih tunggal kaluwarga pinaka saksi (penanggung) tur sumanggup nandangin hutang ipun ring LPD;

d. Wargi dura desa sane pacang nyelang jinah patut polih upasaksi (penanggung) saking karma desa adat Cengkok;

e. Wargi sane numbas palinggihan (Kendaraan) ring LPD majalaran antuk tatacara nyicil/kredit wenang naur Deposit Payment (DP) nganutin pangargan barang;

Pawos 26

Swadarmaning krama sane nyelang jinah (debitur) ring LPD luwire :

a. Nawur prabya administrasi sane kapastika olih Prajuru LPD;

b. Nawur prabya materai sane kapastika olih prajuru LPD;

c. Kredit setunggil sasih keni putran jinah (bunga) manut kewentenan pasar lan kawentenan LPD selanturnyane kaputus antuk pararem utawi Prajuru LPD antuk Surat Keputusan;

d. Ngenahang tabungan wajib 2% (Kalih persen) saking flapon kredit ring LPD, saha salantur ipun mangda nabung sakasidan sanunggil ngasasih, ri tatkala nawur angsuran pinaka Tabungan Sukarela rumasat pinaka gada–gada ring LPD;

e. Prajuru LPD mangda ngaryanin SOP Perkreditan sane jangkep.

SARGAH VI

UGER-UGER LAN PAMIDANDA

Pawos 27

Prajuru LPD sane malaksana tan patut utawi lempas ring uger-uger saha pasuara Sang Angawa Rat, kantos LPD pocol, wicara saha byuta keni pamidanda ngewaliang pepocolan inucap punika, saha tan lempas ring uger-uger Sang Angawa Rat (tuntutan pidana dan atau perdata).

Pawos 28

1. Krama desa adat sane nyelang jinah ring LPD, mangdane nagingin saha nyukserahang lekhita pashobaya (formulir) sejangkep ipun, sane sampun polih linggga tangan saking Bandesa Adat Cengkok lan Prajuru LPD;

2. Kredit sane kearsayang saking Rp 1.000.000,- (Siki Yuta rupiah) ngantos pinih akeh 20% (kalih dasa persen) saking modal LPD turmaning patut kejangkepin antuk wala/kantah (jaminan) marupa arta berana sane mapangarga pinih alit atikelan ring akueh kredit punika, manut tetimbang Bandesa Adat lan Prajuru LPD;

Pawos 29

1. Krama Desa sane ngemolihang kredit ring LPD patut ngewaliang manut uger-uger LPD;

2. Linyok utawi lempas ring pasubaya kredit, krama desa sane nerima kredit keni pamidanda luire:

a. Keni pamidanda nyabran sasih rikala wenten sane kasep nawur angsuran lintangan ring 25 (slae) rahina angsuran jinah ring LPD selanturnyane kaputus antuk pararem;

b. Nyukserahang barang sane kaanggen wala/kantah (jaminan) kalaning sampun tutug dina palelangane, saha lascarya tur tan wenten sane miyalangin Prajuru LPD druwene ngamargiang palelangan;

c. Kasobyahang ring Parum Desa Adat Cengkok, saha tan lempas ring uger-uger Sang Angawa Rat (tuntutan pidana dan atau perdata);

3. Pamidanda ring ajeng kelaksanayang olih prajuru LPD lan prajuru Desa manut awig-awig Desa Adat Cengkok, saha tan lempas ring uger-uger.

4. Pamidanda ring ajeng masengker kantos kredit sane katerima saha panikel-nikel ipun hinggas ring LPD, sajaba wicara tiosan sane katiwakang manut uger-uger Sang Angawa Rat (tuntutan pidana dan atau perdata).

Pasal 30

Pidabdab tata cara ngelaksanayang palelangan wala/kantah sang nyelang jinah yan tan satinut ring pasobhaya kredit:

a. Mawates nem (6) sasih saking sengker pasobhaya kredit (jatuh tempo) sang sane nyelang jinah durung prasida nginggasang hutange ring LPD, tur sampun kabawosin ring Prajuru LPD miwah Badan Pengawas Internal, kaglemekin ngantos ping tiga Prajuru LPD wenang ngelaksanayang palelangan;

b. Pamargin ngalelang kalaksanayang majeng ring krama desa adat;

c. Hasil palelangan inucap kaanggen olih Prajuru LPD nginggasang hutang ipun , saha yening wenten langkung pacang kawaliang ring sang madruwe wala/kantah. Prade saking pamargin palelangane inucap durung kasidhan jangkep hinggas antuka nahur hutange, Prajurun LPD wenang malih ngalelang barang- barang sane pantes pacang lelang, kantos prasida hingas hutange ring LPD;

d. Prajuru LPD tan dados nguadin sengker pasobhaya kredit (Perpanjangan kredit yang sudah jatuh tempo) santukan pamargin inucap lempas ring uger-uger perkreditan.

Pawos 31

1. Krama Desa sane ngemolihang kredit patut nahur hutange wantah ring Kantor LPD Desa Adat Cengkok manut pasobhaya, mangda nenten kantos karereh ka jero sowang – sowang.

2. Prade wenten sang nyelang jinah ring LPD Desa Adat Cengkok seda sadurung hinggas kredit utawi hutange ring LPD, hutang inucap kalanturang/katiwakin ring sentana (ahli waris).

SARGAH VII

OPERASIOANAL KANTOR

Pawos 32

Galah utawi jam operasional Kantor LPD nganutin uger-uger saking guru wisesa inggih punika 70 (pitung dasa) jam awuku sane kakepah:

a. Soma – Sukra : 08.00 kantos 15.00 WITA

b. Saniscara : 08.00 kantos 13. 00 WITA

Kantor LPD nenten kalugra matutup sajabaning Hari Libur Nasional lan Hari Libur sane kasungkemin nganutin uger-uger sane kamargiang saking guru wisesa.

SARGAH VIII

PAHPAHAN PIKOLIH LEMBAGA PERKREDITAN DESA (LPD)

Pawos 33

Pikolih utawi keuntungan Lembaga Perkreditan Desa (LPD) sane sampun bersih nyabran penguntat warsa manut Peraturan Daerah Bali pah-pahan sekadi ring sor:

a. Cadangan Pokok utawi Modal : 60% (enam dasa persen).

b. Dana Wewangunan Desa Adat : 20% (kalih dasa persen).

c. Jasa Pruduksi : 10% (dasa persen).

d. Dana Pemberdayaan : 5% (limang persen)

e. Dana Punia : 5% (limang persen)

Dana punia majeng ring krama/wargi sane kalabu bang polih santunan Rp 3.000.000. (tigang yuta rupiah) kaambil saking Dana Punia (Dana Sosial).

SARGAH IX

NGUWAH-NGUWUHIN PARAREM

Pawos 34

1. Nguwah-nguwuhin pararem puniki kalaksanayang antuk paruman desa manut tata cara

awig-awig Desa Adat Cengkok, malarapan antuk sagilik-seguluk.

2. Sakaluiring sane durung kabawos sajroning pararem puniki, patut kelaksanayang manut tata cara sane sampun mamargi, kadulurin antuk pararem lan sima utawi dresta sane ketah.

SARGAH X

PAMUPUT

Pawos 35

1. Pararem puniki kawastanin Pararem Desa Adat Cengkok, indik Lembaga Perkreditan Desa (LPD).

2. Pararem Desa Adat Cengkok puniki kamargiang ngawit kararemin, Rahina………………..… Pancawara……….……....Wuku………...…….,Tanggal ……….. Sasih…………………Warsa Masehi……………………..….

3. Pararem puniki kalingga tanganin olih Manggala Desa Adat Cengkok.

4. Luwir sang ngalingga tanganin:

Bandesa Adat Cengkok

…………………………

Nomor Regristari MDA Provinsi Bali: ………………………………………..

Panyarikan,

………………………..