SATUA BAWANG TEKÉN KESUNA

 

BAWANG TEKÉN KESUNA

Ada tuturan satua anak makurenan, ngelah koné pianak luh-luh duang diri. Panakné

ané kelihan madan Ni Bawang muah ané cerikan madan Ni Kesuna

Ni Kesuna sayanganga tekén mémé bapanné, asing-asing tagiha tuukina dogén tur

pasaduné misunaang Ni Bawang jeg guguna dogén. Yén Ni Bawang maidih-idihan tekén

méménné, pepesan tuara maan. Yén maan, pepesan misi munyi jelé. Sanget pesan mémé

bapanné mabina-binan mapanak. Japi kéto, Ni Bawang tetep bakti tekén reramané kéto

masih tekén adinné, Ni Kesuna déning ia inget manyama buka sepité.

Sedek dina anu, méménné ngaukin pianakné maka dadua.

“Cening Bawang muah cening Kesuna, mémé lakar ka peken. Nyanan, tuunang padiné

lantas tebuk ajak dadua dadiang baas réh tusing ngelah baas lakar jakan jani! “

Sasubané méménné majalan, lantas Ni Bawang ngaukin adinné Ni Kesuna.

“Kesuna, Kesuna né suba tengai jalan tuunang padiné! “

Masaut Ni Kesuna, “Tuunang ja malu nyanan icang ngetepin! “

Ni Bawang menék ka glebegé lantas nuunang padi ka tanahé. Suba tuun padiné laut

kaukina Ni Kesuna, “Kesuna, padiné suba betén, dong mai getepin!“

“Getepin ja malu nyanan icang nyemuh!“, kéto pasaurné Ni Kesuna. Lantas getepina

padiné tekén Ni Bawang kanti pragat. Buin Ni Kesuna kaukina tekén embokné, “Kesuna,

Kegiatan VII Kulawarga 91

Kesuna dong jemuh padiné! “

“Jemuh ja malu, nyanan icang mempen ka ketungé! “

Padiné lantas jemuha tekén Ni Bawang. Suba tuh koné padiné, buin kaukina Ni Kesuna.

“Kesuna, Kesuna né padiné suba tuh dong pempen jani ka ketungé!“

Masaut Ni Kesuna, “Pempen ja malu nyanan icang ja nebuk!“

Ni Bawang lantas mempen padiné ka ketungé. “Kesuna, Kesuna padiné suba mapempen

ka ketungé, dong mai nebuk!“

“Tebuk ja malu, nyanan icang napinin! “

Lantas tebuka padiné tekén Ni Bawang. Suba suud Ni Bawang nebuk, buin ia makaukan.

“Kesuna, né suba pragat padiné matebuk, dong tapinin jani! “

“Tapinin ja malu nyanan icang ngalesung!“ Nyak masi Ni Bawang napinin. Jani suba dadi

jijih, lantas Ni Kesuna tundéna ngalesung, nanging ia masih tusing nyak. Kacrita suba

dadi baas lantas adinné tundéna ngaba mulihan, nanging Ni Kesuna masi tusing nyak. Payu

Ni Bawang ané ngaba baas mulihan.

Jani Ni Bawang nyemak jun lakar abana ka tukadé anggona ngalih yéh sambilanga

manjus. Ni Kesuna ngénggalang nguap déwékné aji oot ané ada di ketungané. Sagét teka

méméné uli peken lantas negak marérén di baléné.

Ni Kesuna nyagjagin méménné laut masadu kéné, “Mémé, mémé, embok Ni Bawang

lengit pesan, uli semengan pragat ngitungang mapayas dogén. Tundén ngabaang yéh lakar

inem tusing nyak. Uli tuni ia ka tukadé manjus kanti suba tengai kali jani masih tusing teka.“

Kéto pasadun Ni Kesuna jeg guguna tekén méménné. “Nah buin akejep yén teka uli

manjus lakar opak mémé.“

Buin akejepné teka lantas Ni Bawang ngaba yéh di juné muah panganggoné ané mara

besahina di tukadé.

“Mémé, jeg tigtig tendasné Ni Bawang!” Kéto abetné Ni Kesuna.

Méméné lantas nuding tur nyagjagin Ni Bawang.” Ih, iba Bawang, kéné bikas nyainé,

pragat ngresikin déwék dogén. Tusing pesan iba madalem adi. Bikas nyainé cara buron. Jani

taenang tendas ibané. “

Ni Bawang kamemegan tusing nyidaang masaut. Méméné sahasa ngoros lantas nigtig

Ni Bawang.

“Aduh, aduh, aduh, suudang Mémé! “, kéto geluran Ni Bawang. Nanging, méméné

nyumingkinang nigtig kanti telah matatu macuah-cuah pesu getih.

“Kema iba magedi, da mulih-mulih! Kai suba emed mapanak tekén iba, yén bani mulih

lakar nyalnyal tendas ibané encak kai!“

Mara kéto munyin méméné, Ni Bawang laut majalan sambilanga ngeling sengi-sengi

tusing karuan tetujoné. Salantang jalan ia nyelsel déwék ngamé-amé mati. Asing ané

tepukina tundéna ngamatiang déwékné.

Karingkes saking Satua Bali, jilid II B

Lokasi:

Berbagi :