MATERI PIDARTA BALI

PIDARTA BALI

Ngwangun Konsep

Pidarta pinaka silih tunggil seni mabebaosan prasida dados sarana ngwedar pikayunan majeng ring anak tiosan, tetujoné mangda sang sané miarsayang prasida ngresepang miwah nglaksanayang napi sané sampun kawedar. Pidarta kabaos pinaka pangiket baos ring sajeroning acara sakadi ri kala lomba mapidarta, acara wanti warsa sekolah, acara sekaa truna miwah sané tiosan. I rika orator pastika nyihnayang kawagedan nganggén basa Bali miwah kawagedan ri kala maktayang pidarta. Punika mawinan ri sampuné uning ring soroh miwah tata cara makarya pidarta, mangda sayan jangkep kaweruhan sané kapolihang, mangkin alit-alité taler mangda uning tetikesan ri kala mapidarta. Bénjang pungkur yéning kasudi maktayang pidarta mangda napi sané kabaktayang prasida mamargi antar.

Pidarta sinalihtunggil pidabdab nglimbakang basa Bali sajabaning ring masastra. Kawentenan punika prasida kapanggihin ring genah pendidikan formal, birokrasi, pemerintahan taler ring sajeroning pakraman utawi adat, pinaka panyambung lan pidabdab nyihnayang kewagedan mabasa Bali. Manut Wisnu (2020) pidarta inggih punika sinalihtunggil imba retorika (gaya tutur) krama Baliné ri kala marerasan sané tatujoné ngajakin, nguningayang, miwah nyobyahang daging pidarta mangda sang sané mirengang ingkup, cumpu, miwah malaksana manut kadi pangarsan sang oratoris (sang sané maktayang pidarta).

Wangun Pidarta

Karangan miwah surat ketah madaging pendahuluan, isi, miwah penutup. Wangun pidarta taler kadi asapunika, madaging purwaka, daging, miwah pamuput. Pateh sekadi ring bahasa Indonésia, pidarta basa Baliné maderbé wangun utawi format sasuratan sané pastika. Ring sor punika pacang katlatarang wangun pidarta basa Baliné sané kapalih dados tigang palet inggih punika :

a) Murda (Judul)

Patut wénten murda utawi jududl pidarta manut topic utawi téma sané jagi katlatarang.

b) Purwaka/Pamahbah (Pendahuluan)

Ring pahan puniki dagingnyané patut ngaturang pangayubagia ring Ida Sang Hyang Widhi Wasa, pangastuti/pangastawa, panganjali ring para pamilet utawi sang sané mirengang, ngaturang parama suksma, pangaksama, raris nyinahang angga (sapa sira sané mamaos mangda kauningin).

c) Daging pidarta (manut babuat)

- Unteng karya

- Téma

- Manut tetujon bebaosan

Yening ring paruman banjar upami, patut aturang daging-daging parindikan sané mabuat ring krama banjar. Yening ring pawiwahan umpaminnyané ritatkala kapakusara ngangganin kulawarga ring adampati, nguningayang eed upakara, taler tan lali ngaksamayang mungguhing kawéntenan genah, panyambrama miwah sané tios-tiosan. Asapunika taler ring acara sané tiosan.

d) Pamuput

Ri sampun ngenjek ring pamuput atur (pidarta) patut wéntenang :

- Pacutetan daging bebaosan, puniki mabuat pisan duaning risampuné panjang antuk matur-atur mangdené sang mirengang eling malih ring unteng daging bebasoanné

- Pinunas mangda ngawewehin sahanan kakirangan ring sajeroning maktayang pidarta

- Matur suksma antuk uratian sang sané mirengang tur sang sané prasida rauh

- Nunas pangampura manawi wénten sané tan manut ring kayun sang miarsayang.

- Parama santih Maka panguntat anggén wasananing atur miwah muputang pidarta

SOROH PIDARTA

1. Pidarta tutur / Pidarta dadakan (impromptu/improvisasi)

Inggih punika pidarta sané kalaksanayang ring sajeroning acara nénten nganggen teks. Pidarta puniki sida mamargi riantukan sang sané pacang mapidarta punika nadaksara kasudi maktayang pidarta, upami ring sajeroning wénten upacara, sang sané kasudi mangdané mapaica panyanggra atur sané marupa piteket-piteket ring sang sané matatah taler ring sang sané rauh. kawedar sangkaning dadakan utawi nénten madasar antuk pangrencana.

Kalebihannyané :

a) Janten nyihnayang pikayunan sang sané mapidarta

b) Bebaosan sang sané mapidarta madasar antuk kaweruhannyané.

c) Kawéntenan interaksi sareng pamiarsa utawi nénten monoton.

Kakirangan

a) Kirang sistématis mawinan nénten wénten nyiapang téks

b) Sang orator ka kantenang “gerogi” utawi demam panggung (cenderung lebih gugup)

c) Prasida nénten manut ring bantang (téma)

2. Pidarta sasuratan / Ngwacen pidarta (manuskrip/naskah)

Inggih punika pidarta sané sampun kadabdabang, tur ring sajeroning mapidarta puniki nganggen teks utawi naskah. riantukan sang sané mapidarta sampun siaga jangkep sareng naskah sané kawacen. Pidarta puniki lumrahnyané kabaktayang olih para pejabat. Kawedar sangkaning sampun kasiagayang téksnyané.

Kalebihannyané :

a) Kakaryanang logis tur sistématis

b) Sang orator prasida milih kruna-kruna sané becik

c) Manut ring bantang (téma) utawi topik

Kakirangan :

a) Interaksi nénten becik sareng pamiarsa

b) Makeh merluang/ngarsayang galah anggén ngaryanang téks

3. Pidarta arda tutur/Ngwacen ringkesan pidarta (ekstemporer)

Inggih punika pidarta sané kabaktayang nganggé ringkesan utawi skema, sang sané mapidarta sampun nyiagayang marupa sesuratan unteng-unteng pidarta kewanten. Sané lumrah kabaktayang olih pangenter acara utawi ugrawakia.

Kalebihannyané :

a) Kawéntenan interaksi sareng pamiarsa.

b) Nénten makta akeh naskah, wantah orak-orek utawi ringkesan bantang bebaosan

Kakirangané :

a) Prasida nénten manut ring bantang (téma)

b) Kirang sistématis mawinan nénten wénten nyiapang téks

c) Meweh milih kruna sané beci

4. Pidarta sané kaapalang (memoriter / menghafal),

Inggih punika matéri sané pacang kabaktayang ring arep pamiarsa sampun kasiapang tur kasurat dumun selanturnyané patut kawacen sesai-sai, tur ring sajeroning pacang mapidarta sang sané mapidarta nénten nganggen teks.

Kalebihannyané :

a) Téks kakaryanang logis tur sistématis

b) Prasida milih kruna sané becik

c) Manut ring téma utawi topik

Kakirangan :

a) Interaksi sareng pamiarsa pacang kirang mawinan sang orator ngutsahayang eling ring kruna sané wénten ring téksnyané

b) Ngarsayang akeh waktu

c) Kirang penghayatan ritatkala maktayang pidarta

d) “Tempo” sang orator ritatkala maktayang pidarta gelis (Terlalu cepat dalam menyampaikan)

Yéning uratiang becik – becik, kantun akéh wénten luir bebaosan mabasa bali alus sané wangunnyané masaih ring pidarta. Bebaosan punika madué wasta niri-niri minakadi:

1) Pidarta (pidato)

Bebaosan mabasa bali alus ring acara pakraman sané dagingnyané umum utawi nénten ngeninin indik ajahan agama.

Upami :

- pidarta kelian ring krama banjar (indik ngwangun balé banjar)

- pidarta pamilet lomba ring pakraman (indik narkoba)

2) Dharma wacana (upanisad, siraman rohani)

Inggih punika bebaosan mabasa bali alus ring acara pakraman sané madaging saindik-indik ajahan agama.

Upami:

- Bebaosan Ida Pedanda Made gunung ring Bali TV

- Bebaosan Sri Mpu Dukuh Sakti ring Jaba Pura Pangkung Prabu

3) Sambrama wacana (kata sambutan)

Inggih punika bebaosan mabasa bali alus sané kawedar pinaka nyanggra sajeroning acara pakraman utawi pinaka panyanggra tamiu sajeroning upacara adat utawi agama.

Upami :

- Panyanggra Kelian Banjar Dinas ring ulang tahun sekaa teruna

- Panyanggra sang madué karya ring para undangan

4) Atur piuning (laporan)

Inggih punika bebaosan mabasa bali alus sané nguningayang kawéntenan karya sané kalaksanayang.

Upami:

- Atur piuning manggala karya ulang tahun

- Atur piuning pangrajeg karya pacaruan ngresigana.

LUIR BEBAOSAN:

1) Pidarta (pidato)

Bebaosan mabasa bali alus ring acara pakraman sané dagingnyané umum utawi nénten ngeninin indik ajahan agama.

Upami :

- pidarta kelian ring krama banjar (indik ngwangun balé banjar)

- pidarta pamilet lomba ring pakraman (indik narkoba)

2) Dharma wacana (upanisad, siraman rohani)

Inggih punika bebaosan mabasa bali alus ring acara pakraman sané madaging saindik-indik ajahan agama.

Upami:

- Bebaosan Ida Pedanda Made gunung ring Bali TV

- Bebaosan Sri Mpu Dukuh Sakti ring Jaba Pura Pangkung Prabu

3) Sambrama wacana (kata sambutan)

Inggih punika bebaosan mabasa bali alus sané kawedar pinaka nyanggra sajeroning acara pakraman utawi pinaka panyanggra tamiu sajeroning upacara adat utawi agama.

Upami :

- Panyanggra Kelian Banjar Dinas ring ulang tahun sekaa teruna

- Panyanggra sang madué karya ring para undangan

4) Atur piuning (laporan)

Inggih punika bebaosan mabasa bali alus sané nguningayang kawéntenan karya sané kalaksanayang.

Upami:

- Atur piuning manggala karya ulang tahun

- Atur piuning pangrajeg karya pacaruan ngresigana.

Dharma tula

Inggih punika acara sané marupa pabligbagan utawi masadu arep (diskusi) pantaraning sang sané maktayang baos sareng sang sané nyarengin taler mirengang baos

Widya tula

Inggih punika pabligbagan saindik-indik daging kaweruhan (ilmu pengetahuan) sané kawicaraang

Dharma Suaka

Inggih punika bebaosan ngaptiang kapiolasan utawi daging ipun wénten sané jagi kasuakayang.

Sima karma

patemon madarmasuaka

Saur-pitakén

tanya jawab.

Sajaba punika, patut taler kawikanin mungguing wénten makudang-kudang istilah kanggén maosang anaké sané sering milet mabebaosan ring pakraman (patemon resmi) minakadi:

1. Pamidarta : sang sané mapidarta (orator)

2. Pamaos : sang sané maosang kriapatra utawi makalah (pemakalah, penyaji)

3. Ugrawakia : pangénter, sang sané ngénterang acara (MC, pembawa acara)

Ngulati Bali “Clean and Green”

Om Swastyastu

Sumber : http://www.ocgoodguys.com

Ida dané, para manggala, miwah para guru panuntun sané wangiang titiang. Taler para pamilet lomba mapidarta sané tresna asihin titiang. Ring galahé sané becik puniki ten lali titiang ngaturang suksmanin manah majeng ring Ida Sang Hyang Widi Wasa dwaning iraga sareng sami ngamolihang karahayuan miwah karahajengan kénten taler para manggala

sekolah sané sampun ngicénin titiang galah jagi ngaturang pidarta ring rahina becik puniki.

Pidarta sané jagi baktyang titiang nganinin indik “Ngulati Bali Clean and Green. Saking dumun, sampun akéh pidabdabé sané kamargiang antuk krama Baliné mangda jagat Baliné setata makanten “clean and green”. Kamanah antuk titiang, clean mateges bresih utawi resik, green mateges hijau, gadang ngelom utawi dayuh, saha sida ngulangunin. Dadosnyané, sesanti clean and green puniki madué patitis mangda wewidangan jagat Baliné setata makanten resik, mawastu sida nayuhin tur ngulangunin. Palemahan sané resik, asri, lestari, tur dayuh, banget pisan kaaptiang kanggén nyanggra pawangunan widang pariwisata budaya, pinaka sumber dévisa sané utama pisan.

Ida dané sareng sami sané wangiang titiang, wicara utawi pikobet sané banget karasayang olih para kramané mangkin napi malih pemerintah pinaka Guru Wisesa, wantah wicara indik sampah, anut ring konsep lingkungan tradisional ring Bali, ketah kabaosang "Tumpek Wariga", wantah rahina sané ngicénin kautaman ring sajeroning i raga ngraksa utawi miara sakancan sané maurip anutang ring konsep lingkungan hidup sané sampun ketah mamargi ring jagat Bali. Mangkin tunasang titiang, napi ké sujati séktor pariwisatané sané banget kaandelang ring Bali? Yéning sayuakti, sapunapi iraga patut niténin? Napi jagi banggyang palemahan druéné cemer, nénten asri malih?

Majanten patut kaupapira mangda setata resik tur asri, kanggén nudut pikayunan wisatawané rauh ka Bali. Sajeroning utsaha ngrajegang jagat Baliné, krama Baliné ketah nginggilang sepat siku-siku sané mawasta Tri Hita Karana (tetiga sané mawinan jagaté degdeg rahajeng miwah sukerta santi). Yéning mawali ka murdan pidarta puniki, tetuek sané patut kautamayang wantah pawangunan widang palemahan. Sajeroning ngupapira widang palemahan, kantun akéh wénten wicara minakadi indik cemernyané toya miwah ibu pertiwi, polusi udara, indik sampah organik, miwah indik global warming.

Indik sampah punika utamannyané sampah plastik sané kasorohang pinaka sampah anorganik. Sampah-sampah anorganik puniki, manut para sujana sané nuréksain indik kawéntenanyané, sawiakti abot pisan ri kala pacang ngawaliang kawéntënannyané, sajabaning kadaur ulang malih. Sakémaon, nénten sinamian sampah-sampah plastik punika prasida kadaur ulang, makadi sampah-sampah plastik sakadi tas kresek. Punika makawinan ring sajeroning pidarta puniki, titiang pacang nuekang bebaosan ring sajeroning judul pidarta punika.

Kaanggénnyané tas kresek salami punika, sawiakti prasida ngélahan para krama ri kala makta aban-aban, taler punika i dagang, nénten répot malih mungkus dagangannyané, sané karasa ngélahin utawi praktis, nanging yéning resepang sayan ngakéhang para kramané nganggé tas krésék, sayan ngakéhan taler polusi ring jagaté puniki, sané kasuén-suén jagaté puniki kahibekan antuk polusi sampah plastik, sané karasa méweh antuk naur ulang, tur salanturnyané pastika akéh pikobet sané pacang metu, nénten ja ring sajeroning kahuripan i manusa kémanten, taler ring sajeroning kawéntenan tanahé sané prasida ngirisang utawi ring sajeroning pertanian nénten malih landuh sakadi sané riin-riinan.

Punika yéning karesepang, sangkaning i raga karasa gampang ring sajeroning kahuripan nganggé piranti-piranti saking plastik, nanging akéhan pikobet sané katami olih para yowan ri wekasan, nika makawinan mangdané saking pikobet sakadi puniki, mangdané metu pikayunan ngentosin piranti-piranti sakadi tas krésék saking plastik punika dados tas utawi pamungkus saking kertas, yéning dados pemerintah prasida ngamedalang undang-undang indik lingkungan hidup antuk nénten dados mawali nganggé tas krésék ring sajeroning kahuripan, sajabaning tas krésék sané prasida kadaur ulang malih, prasida kagentosin antuk tas sané mawit saking kertas, sané wekasan élah pacang kadaur ulang malih, sakadi sané sampun mamargi lumbrah ring dura negara utamannyané ring panegara-panegara éropa, sané banget pisan nyentokang tetuek kabersihan punika ring sajeroning kahuripan.

Sumber : http://riauheadline.com

Ida dané sané wangiang titiang. Mangkin pinunas titiang, pamekas ring para yowana makasami, mangda saking alit iraga sareng ngremba lelingsiré, midabdabin karesikan miwa kaasrian palemahan jagat druéné. Yéning nénten iraga pacang ngrarisakin saha ngrajegang, sapasira malih? Napi ké wong dura negari?

Doh para ipun pacang kayun mamahayu jagat. Wantah iraga sareng sami sané patut urati utawi glitik, ngresikin pakarangan, ngresikin tlajakan soang-soang, ngresikin got-got mangda nénten sampetan. Ida dané miwah para pamilet sané singgihang titiang, Sajeroning niténin palemahan, saking dumun parajana Baliné sampun kaloktah pinaka masyarakat gotong royong, nginggilang pasuka-dukan miwah panyamabrayan, sagilik-saguluk salunglung sabayantaka, paras-paros sarpana ya. Sajeroning ngulatiang palemahan sané resik miwah asri, pidabdab krama Baliné sekala miwah niskala. Sekamiwahé, sang ngawerat mikukuhin sesanti clean and green. Tegesipun, saking alit patut krama Baliné urati ring tatakrama niténin palemahan sané asri, resik, tur dayuh. Niskamiwahé, ngupapira bhuana agung antuk ngamargiang bhuta yadnya sané matetujon ngrestitiang jagaté mangda setata rahajeng. Kawewehin antuk masegeh nyabran Kajeng Kliwon, macaru agung nyabran tileming kasanga, ngamargiang upacara tumpek wariga, miwah sané lianan.

Punika sami matetujon gumanti jagaté degdeg rahajeng, pinaka daerah tetujon wisata sané ngwetuang dévisa utama. Ida dané sareng sami, pinaka pacutetan atur titiangé i wawu, prasida aturang titiang kadi asapuniki. 1) Clean and green wantah sesanti sané kanggén nuldulin pikayunan krama Baliné, mangda setata nguratiang karesikan palemahan jagat Baliné pinaka genah tetujon wisata. 2) Sané patut ngrajegang sesanti clean and green puniki wantah i krama Bali, saking alit-alit miwah para yowana rauhing para lelingsir druéné mangda jagaté setata degdeg rahajeng.

Ida dané sinamian, wantah kadi asapunika, titiang prasida matur ring galahé sané becik puniki. Makakirang langkung atur pidartan titiang, manawi wenten sané tan manut ring arsa, sakadi unjuk lungsur, anggah ungguhing basa, lugrayang titiang nglungsur agung rena pangampura. ten lali titiang ngaturang suksmaning manah antuk uratian ida dané sareng sami. Inggih, puputin titiang antuk ngojarang parama santih.

Om Santih Santih Santih Om.

Kaketus saking

Wacika Sari 1 Karya Dr. Drs I Nyoman Suwija,M.Hum

PITAKEN:

1. Napi murdan pidartané ring ajeng?